പെരുവ : പെരുവയിൽ ജോലി ചെയ്യുന്ന പശ്ചിമ ബംഗാൾ സ്വദേശിയായ അതിഥി തൊഴിലാളിക്ക് മലേറിയ സ്ഥിരീകരിച്ചു. ഇതോടെ പെരുവയിലും സമീപ പ്രദേശങ്ങളും കേന്ദ്രീകരിച്ച് ആരോഗ്യവകുപ്പ് പ്രതിരോധ പ്രവർത്തനങ്ങൾ ശക്തമാക്കി.
പതിനഞ്ച് ദിവസം മുൻപാണ് തൊഴിലാളി പശ്ചിമ ബംഗാളിൽ നിന്ന് ഇവിടെ എത്തിയത്. അസ്വസ്ഥത അനുഭവപ്പെട്ടതിനെ തുടർന്ന് നടത്തിയ പരിശോധനയിലാണ് മലേറിയ സ്ഥിരീകരിച്ചത്. രോഗിയുടെ ആരോഗ്യനില നിരീക്ഷിച്ചുവരുന്നതായി ആരോഗ്യവകുപ്പ് അധികൃതർ അറിയിച്ചു.
ഹെൽത്ത് ഇൻസ്പെക്ടർ ശ്രീലതയുടെ നേതൃത്വത്തിൽ പ്രദേശത്ത് നിരീക്ഷണവും പ്രതിരോധ പ്രവർത്തനങ്ങളും നടത്തിവരികയാണ്. അതിഥി തൊഴിലാളികൾ താമസിക്കുന്ന കേന്ദ്രങ്ങൾ ഉൾപ്പെടെ വിവിധ സ്ഥലങ്ങളിൽ കൊതുക് നശീകരണത്തിനായുള്ള ഫോഗിംഗ്, സ്പ്രേയിംഗ് തുടങ്ങിയ നടപടികൾ ആരംഭിച്ചിട്ടുണ്ട്.
മലേറിയ വ്യാപനം തടയുന്നതിനായി ജനങ്ങൾ പരിസര ശുചിത്വം ഉറപ്പാക്കണമെന്നും കൊതുക് വളരാൻ സാധ്യതയുള്ള വെള്ളക്കെട്ടുകൾ ഒഴിവാക്കണമെന്നും ആരോഗ്യവകുപ്പ് നിർദേശിച്ചു.
