കാലാവധി അവസാനിക്കാൻ ദിവസങ്ങൾ മാത്രം ശേഷിക്കെ സബ് ഇൻസ്പെക്ടർ (എസ്.ഐ.) റാങ്ക് പട്ടികയിൽ ഉൾപ്പെട്ട ഉദ്യോഗാർഥികൾക്ക് നിയമനം നൽകാൻ സർക്കാർ നടപടി തുടങ്ങി. ജൂൺ 9-ന് കാലാവധി അവസാനിക്കുന്ന റാങ്ക് പട്ടികയിൽ നിന്ന് 43 പേർക്ക് നിയമനം ഉറപ്പാക്കുന്നതിനുള്ള നടപടികളാണ് പുരോഗമിക്കുന്നത്.
ഇതിനാവശ്യമായ നടപടികൾ അടിയന്തരമായി സ്വീകരിക്കാൻ ബന്ധപ്പെട്ട ഉദ്യോഗസ്ഥർക്ക് നിർദേശം നൽകിയതായി അറിയുന്നു. കഴിഞ്ഞ വർഷം ജൂൺ 9-നാണ് പി.എസ്.സി. എസ്.ഐ. റാങ്ക് പട്ടിക പ്രസിദ്ധീകരിച്ചത്. ഒരു വർഷത്തെ കാലാവധി അവസാനിക്കാനിരിക്കെ നിയമന നടപടികൾ വൈകുന്നതായി ചൂണ്ടിക്കാട്ടി ഉദ്യോഗാർഥികൾ മന്ത്രിയെ സമീപിച്ചിരുന്നു.
ചില റാങ്ക് പട്ടികകളുടെ കാലാവധി നീട്ടാൻ മന്ത്രിസഭ തീരുമാനിച്ചിരുന്നെങ്കിലും എസ്.ഐ. റാങ്ക് പട്ടിക അതിൽ ഉൾപ്പെട്ടിരുന്നില്ല. ഇതോടെ പട്ടികയിലെ ഉദ്യോഗാർഥികൾ ആശങ്ക പ്രകടിപ്പിച്ചിരുന്നു.
അർഹതയുള്ള ഉദ്യോഗാർഥികൾക്ക് ജോലി നഷ്ടപ്പെടാത്തവിധം സർക്കാർ ഇടപെടുമെന്നും നിയമന നടപടികൾ വേഗത്തിലാക്കുമെന്നും മന്ത്രി ഉറപ്പുനൽകിയതായി ഉദ്യോഗാർഥികൾ അറിയിച്ചു.
റാങ്ക് പട്ടികയുടെ കാലാവധി അവസാനിക്കുന്നതിന് മുൻപ് നിയമന നടപടികൾ പൂർത്തിയാക്കാനാണ് ഇപ്പോഴത്തെ ശ്രമം.
