ആദ്യ ദിനം കുടുങ്ങിയത് 20 സ്‌കൂൾ ബസുകൾ

ആദ്യ അധ്യയന ദിനം തന്നെ 20 സ്‌കൂൾ ബസുകൾക്കെതിരെ നപടിയുമായി മോട്ടർ വാഹന വകുപ്പ്. നേരത്തെ സാങ്കേതിക തകരാറുകൾ ചൂണ്ടിക്കാട്ടിയിരുന്ന ബസുകൾ അതു പരിഹരിക്കാതെ സ്‌കൂൾ ട്രിപ്പ് നടത്തിയതിനാണു നടപടി. ഈ ബസുകൾക്കെല്ലാം ഫിറ്റ്നസ് സർട്ടിഫിക്കറ്റ് ഉണ്ടെങ്കിലും സ്‌കൂൾ തുറക്കും മുൻപ് മോട്ടർ വാഹന വകുപ്പു നടത്തിയ സ്പെഷൽ പരിശോധനയിലാണു പോരായ്മകൾ കണ്ടെത്തിയത്. അവ പരിഹരിച്ചു വീണ്ടും ഹാജരാക്കാൻ നിർദ്ദേശിച്ചിരുന്നെങ്കിലും നടപ്പായില്ല. ഫിറ്റ്നസ് സർട്ടിഫിക്കറ്റ് ഉണ്ടെങ്കിലും മോട്ടർ വാഹന വകുപ്പിൻ്റെ സ്പെഷൽ പരിശോധന സ്‌റ്റിക്കർ പതിച്ച സ്‌കൂൾ വാഹനങ്ങളിൽ മാത്രമേ വിദ്യാർഥികളെ കയറ്റാവൂയെന്ന് നിർദേശം നൽകിയിരുന്നു. ഇത്തരം വാഹനങ്ങൾ സ്‌കൂൾ ട്രിപ്പ് നടത്തുന്നതു തടയാൻ പരിശോധന തുടരുമെന്ന് അധികൃതർ പറഞ്ഞു.