വേളാങ്കണ്ണി പുണ്യാരോഗ്യമാതാ ബസിലിക്കയിൽ തിരുനാൾ കൊടിയേറ്റം; വിശ്വാസികളുടെ വൻ തിരക്ക് വേളാങ്കണ്ണി: ലോകപ്രശസ്ത തീർത്ഥാടന കേന്ദ്രമായ വേളാങ്കണ്ണി പുണ്യാരോഗ്യമാതാ ബസിലിക്കയിലെ 2026-ലെ വാർഷിക തിരുനാളിന് ഭക്തിനിർഭരമായ അന്തരീക്ഷത്തിൽ തുടക്കമായി. ഓഗസ്റ്റ് 29-ന് വൈകുന്നേരം നടന്ന കൊടിയേറ്റത്തോടെയാണ് സെപ്റ്റംബർ 8 വരെ നീളുന്ന വാർഷിക തിരുനാൾ ആരംഭിച്ചത്.
തഞ്ചാവൂർ രൂപതാ മെത്രാൻ ബിഷപ്പ് എൽ. സഗായരാജ് തിരുനാൾ കൊടി ആശീർവദിച്ച് കൊടിമരത്തിൽ ഉയർത്തി. കൊടിയേറ്റ ചടങ്ങിൽ പതിനായിരക്കണക്കിന് തീർഥാടകർ പങ്കെടുത്തു. തമിഴ്നാട്ടിന് പുറമെ കേരളം ഉൾപ്പെടെയുള്ള വിവിധ സംസ്ഥാനങ്ങളിൽ നിന്നും വിദേശത്തുനിന്നുമുള്ള തീർഥാടകരും വേളാങ്കണ്ണിയിൽ എത്തിച്ചേർന്നിട്ടുണ്ട്.
കൊടിയേറ്റത്തിന് മുന്നോടിയായി തിരുനാൾ കൊടി വഹിച്ചുള്ള പ്രദക്ഷിണവും തുടർന്ന് പ്രത്യേക പ്രാർഥനകളും തിരുക്കർമ്മങ്ങളും നടന്നു. തിരുനാൾ ദിവസങ്ങളിൽ വിവിധ ഭാഷകളിൽ പ്രത്യേക തിരുപ്പലികളും പ്രാർഥനകളും നടക്കും. തമിഴ്, മലയാളം, തെലുങ്ക്, ഹിന്ദി, ഇംഗ്ലീഷ്, കൊങ്കണി തുടങ്ങിയ ഭാഷകളിലാണ് പ്രധാന തിരുക്കർമ്മങ്ങൾ നടക്കുന്നത്.
ഇതിനിടെ കൊടിയേറ്റത്തിനിടെയുണ്ടായ പടക്കപ്രയോഗത്തിൽ സമീപത്തുണ്ടായിരുന്ന ഹീലിയം ബലൂണുകൾക്ക് തീപിടിച്ച് പൊട്ടിത്തെറിച്ചതിനെ തുടർന്ന് നാലു തീർഥാടകർക്ക് പരിക്കേറ്റു. ഇവർക്ക് പ്രാഥമിക ചികിത്സ നൽകിയ ശേഷം നാഗപട്ടണം സർക്കാർ മെഡിക്കൽ കോളജ് ആശുപത്രിയിൽ പ്രവേശിപ്പിച്ചതായി റിപ്പോർട്ടുകളുണ്ട്.
ഇന്ന് — ഓഗസ്റ്റ് 30-ലെ തിരുക്കർമ്മങ്ങൾഇന്ന് മുതൽ സെപ്റ്റംബർ 7 വരെ വേളാങ്കണ്ണി ബസിലിക്ക, വിൻമീൻ ആലയം, മേൽക്കോവിൽ, കീഴ്ക്കോവിൽ തുടങ്ങിയ വിവിധ ആരാധനാലയങ്ങളിൽ രാവിലെയും ഉച്ചയ്ക്കും വിവിധ ഭാഷകളിലായി പ്രത്യേക തിരുപ്പലികളും പ്രാർഥനകളും നടക്കും.
ഇന്നത്തെ ദിവസം മുതൽ തിരുനാളിന്റെ നവനാൾ പ്രാർഥനകൾക്ക് തുടക്കമാകും. മലയാളം ഉൾപ്പെടെ വിവിധ ഭാഷകളിൽ തിരുക്കർമ്മങ്ങൾ നടക്കുന്നതിനാൽ കേരളത്തിൽ നിന്നെത്തുന്ന തീർഥാടകർക്കും പ്രത്യേകമായി പങ്കെടുക്കാൻ അവസരമുണ്ട്.തിരുനാളിന്റെ ഭാഗമായി വരും ദിവസങ്ങളിൽ പ്രദക്ഷിണങ്ങളും പ്രത്യേക പ്രാർഥനകളും നടക്കും. സെപ്റ്റംബർ 7-നാണ് പ്രധാന തിരുത്തേർ പ്രദക്ഷിണം, സെപ്റ്റംബർ 8-ന് പരിശുദ്ധ കന്യകാമറിയത്തിന്റെ ജനനത്തിരുനാൾ ആഘോഷിച്ച് വാർഷിക തിരുനാൾ സമാപിക്കും.
